玫瑰滷水雞翼 Lou Sauce Rose Chicken Wings

滷水是廣東人最愛，乜都可以滷一餐！滷水蛋，滷水雞翼，滷水鴨等等，都十分受歡迎！滷水味咸咸哋，十分開胃，而且凍食亦得，用來做夏日醒胃晚餐就最好不過。剛好上次焗蛋糕用剩了一些乾玫瑰花瓣，加一點玫瑰花瓣下去滷水汁中煮，令汁料加添花香，看起來滷水雞翼都變得高貴了！



講起滷水，我家雪櫃有一包陳年滷水汁，前前後後滷了四年多，每一次我要做滷水時，我都會拎佢出來做滷水汁的膽汁，再加返水，香料或調味料下去，繼續滷下去，希望我包滷水汁可以綿年不絕～

發夢至此，其實滷水汁好易整，只要到雜貨鋪買一包滷水香料，洗淨後加入老抽，生抽，紹興酒，冰糖和豆瓣醬（如喜歡辣）等煮滾便成。詳細滷水汁料份量可以參考，之前寫過的一篇［滷水牛肋條］---> http://misstahomemade.blogspot.hk/2014/05/blog-post_15.html

材料：

1. 雞翼............10-12隻（約1磅）
2. 薑片............2片
3. 乾玫瑰花.............2湯匙

滷水汁：

1. 滷水香料包.............1包
2. 湯料包.............1個
3. 生抽.............1/4杯
4. 老抽.............1/2杯
5. 紹興酒.............1/2杯
6. 冰糖.............50g
7. 水或雞湯.............3杯
8. 豆瓣醬.............1湯匙（怕辣可不下）

做法：

1.　燒滾一鍋水，放入雞翼飛水3分鐘去血水。用廚房紙吸乾水份，用剪刀在雞翼的後背剪開中間，使滷肉更入味。

2.　滷水香料包用水洗淨，放入湯料包袋好打結。

3.　調好滷水汁，放入雞翼，滷水香料袋，薑片和乾玫瑰花煮滾汁料，加蓋轉小火慢慢炆雞翼30分鐘至軟腍，盛起撒少許乾玫瑰花碎作裝飾。


小貼士：

1. 用完嘅滷水汁放涼後可以隔去雜質和油脂，倒入保鮮袋內，排出空氣密封放入雪櫃一晚，第二日會變成啫喱狀，再隔走上層的浮脂，放入冰箱保存可以存放很久很久。
2. 下次要再滷肉時，將冰箱內的滷水汁倒入鍋中，做滷肉膽汁，着量加入生，冰糖，雞湯或香料（不一定每次都要再加香料，味道變淡才加），再滷過肉。滷水汁可以不斷重用，愈滷愈風味久存！
3. 滷水香料包可以在街市的雜貨鋪買得到。
4. 滷水香料包可能在曬乾時沾到灰塵，稍為清洗一下會比較好。
5. 超級市場會有現成的滷水汁賣，可以先試味，再自己着量加冰糖和生抽調味。