豪華升級版～整個蕃茄海鮮飯 Simple Whole Tomato Seafood Paella

還記得兩年前的整個蕃茄飯嗎？相信大家都有試整過！整個蕃茄飯我整過一次俾大夫食，點知佢話冇咩特別😫😫，今晚我決定為整個蕃茄飯來一個大平反！！加入海鮮，來做一個整個蕃茄飯的豪華升級版，海鮮的精華流哂入啲飯度，加上甜酸的蕃茄，真係好好味呀！～😋😋

這個豪華升級版整個蕃茄海鮮飯食落似燉飯，蕃茄的酸甜和海鮮的精華煮哂落啲米飯入面，真係好好味道架！連大夫都為這次的蕃茄飯大讚好食，今次大平反成功！～

材料：

1. 白米…………1.5杯
2. 清水……………1.5杯
3. 蕃茄…………2個
4. 鮮蝦…………6-7隻
5. 蜆…………10隻
6. 蒜頭…………3粒（切片）
7. 橄欖油…………1湯匙
8. 牛油…………10g
9. 鹽…………1茶匙
10. 黑胡椒粉……………適量
11. 新鮮蕃茜或羅勒…………適量

做法：

1. 白米洗淨浸清水半小時。鮮蝦去殼去腸，留蝦頭備用。蕃茄一個底部界十字，另一個蕃茄切片。蜆浸清水（份量以外）半小時，放入雪櫃中吐沙。

2. 蒜頭切片。在鍋中下橄欖油，放入蒜片和蝦頭炒香，取出蝦頭留用。

3. 加入白米、清水、鹽和少許黑胡椒碎攪拌並煮滾，在中央放上一個蕃茄，扇形圍着蕃茄放上蕃茄片，加入炒香的蝦頭，加蓋轉小火煮10分鐘。

4. 開蓋取出蝦頭棄掉，放上蝦子、蜆和牛油粒，加蓋繼續煮多5分鐘，熄火焗15分鐘。

5. 打開鍋蓋，撒上蕃茜或羅勒和黑胡椒碎，攪爛中央的蕃茄和米飯便成！

小貼士：

1. 白米先浸水半小時，可以令米飯更香軟好食。
2. 蝦頭先炒香，並與米飯一同煮，可以令蝦的鮮味精華與白飯混在一起，更香更美味。
3. 不喜歡蕃茄皮的朋友可以在攪拌米飯和海鮮前，先脫掉蕃茄皮。
4. 這個食譜可以改用電飯煲做，同樣將白米，水，調味料，蕃茄，橄欖油和炒過的蒜片和蝦頭放入電飯煲中，按掣開始煮飯，見到米飯收乾水，開蓋取出蝦頭，加入蝦子，蜆和牛油粒，煮至跳掣，開蓋撒香草和黑胡椒粒攪混便成。