水果果凍杯 Mixed Fruits Jeely Cup

 

夏日炎炎，感覺今年的夏天特別炎熱，今年嘅夏天下雨少，颱風都未有向過香港吹過一次，真係有時想涼快少少都唔得。雖然唔係想天天下雨天，但係都唔好日日都萬里冇雲呀。正因如此，夏日生果真係最適合用來消暑涼快，由其是冰涼的，加埋透明嘅啫喱，簡直就係夏日炎炎嘅消暑恩物呀～

早兩日我問我家大爺想食什麽甜品呀？佢就答我想食啫喱。我話啫喱太易整，有冇啲有創意一點嘅嘢想食呀？佢話只係想食啫喱。簡直就係一位大細佬嘛！！！好！！就整啫喱，所以就整了個夏日水果果凍杯。佢一見到我在整就好開心咁，第二日仲特登打開雪櫃話，嘩！硬哂啦！食得啦！真係好攪笑～

 

這個果凍杯用了新鮮的生果，當然顏色要夠sharp，整出來才醒神漂亮啦！大家不仿試試吧～

 

 

材料：

1. 士多啤梨............3粒
2. 奇異果............1個
3. 橙............1/4個
4. 菠蘿.............2片
5. 糖...........4 1/2湯匙
6. 滾水............450mL
7. 荔枝汁............100mL
8. 蒟蒻粉..............26g (或魚膠粉12g)

做法：

1. 生果去皮切小塊待用。荔枝汁可用罐頭或新鮮。

 

 

2. 煲滾水，將滾水水，糖和蒟蒻粉攪勻至完全融化，再倒入荔枝汁拌勻。

 

 

 

3. 倒入半杯蒟蒻啫喱，放入生果，再倒滿全杯，放入雪櫃冷藏1晚至凝固便成。

 

 

 

小貼士：

1. 用蒟蒻粉會煙靭一些，但健康點，又有天然纖維，如果想軟滑點似啫喱可以用魚膠粉。
2. 亦可以加入1/8條雲呢拿條，增添香味。