酥皮食譜1：（甜點）迷你蝴蝶酥

唔知大家有冇試過買了一包6塊裝的雪藏酥皮返家只用了一點之後，就一直放在冰格，雪呀雪呀，到最後都唔記得咗佢嘅存在。到想起冰格內的酥皮時，因為雪得太耐或保鮮紙包得唔好，想拿出來用時都已經干哂，用不了啦……

我最初就係咁，成日都好浪費，用不到半包就扔掉，有時更怕雪太耐唔新鮮，就算冇干到，都唔敢再用。之後，我發現銅鑼灣一間烘焙專門店有得單買一塊急凍酥皮，但買一張就要幾十蚊，我去cc super買6塊一包都係貴冇幾多錢，買過幾次後，就唔甘心再捱貴材料，用返原裝一包6片裝！自此，我會次次都想好6個食譜，想好每一塊酥皮會用來整什麼，先會去買一包酥皮返家做各樣酥皮小食。其實除咗整酥皮湯，酥皮真的可以用來整好多其他食物。而在我常用的recipe中，我最喜歡就是用它整各種小食及甜品。

其實都係好簡單的食譜，專俾啲懶人（即是我）用來做簡易速成小食～今次酥皮第1擊就是甜點 - 迷你蝴蝶酥。今日係母親節，剛好焗一些心形蝴蝶酥給媽媽做禮物～做法很簡單，所需材料不多，幾個步驟就可以完成。不過要做出上色靚同完美蝴蝶型的蝴蝶酥就有啲tricky...

材料：

1. 急凍酥皮…………1塊
2. 糖…………60g
3. 水…………適量

做法：

1) 急凍酥皮放回室溫解凍。

2) 將酥皮放在工作枱平面上，用膠鬚在一面掃上一層水，再撒上一層砂糖。在上面放一張保鮮紙，底面反轉，另一面如是掃水撒糖。

3) 如圖一樣，先摺酥皮四份一，再撒糖，再摺撒糖，最後成一長條形，包好放入冰箱雪半小時。

 

4) 預熱焗爐200度10分鐘，取出酥皮，然後切成半吋厚。

5) 將酥皮平放在焗盤上，兩翼尾端微微打開，放入已預熱焗爐200度7分鐘，取出反轉蝴蝶酥再焗7-10分鐘或至金黃色即成。

焗起嘅蝴蝶酥金黃香脆，因為加了水，砂糖在焗嘅過程中溶化，成了焦糖，所以十分上色。我試過焗前在蝴蝶酥上面掃上牛油，但金黃的效果冇用水及砂糖咁明顯，所以都係喜歡用水和砂糖，最簡單快捷。這是原味蝴蝶酥的食譜，如果想做其他口味嘅，有好多選擇，例如用雲呢拿糖，摺蝴蝶酥時中間加入黑白芝麻，或者撒些肉桂粉在中間，加入果仁碎等等，就可以變化出好多不同口味。

這個法式小甜點再唔係什麼複雜的食譜，妳也可以烘焗出高級甜點，

快啲買一包酥皮在家試做做看啦！