韓醬炆牛肋條 Korean Beef Stew

 

近來韓風大熱，令我都多留意韓流，試試整多啲韓食。首先就試試整這個韓醬炆牛肋條。這個菜用了韓式牛肉醃醬做汁底， 紅蘿蔔跟着傳統韓國人的方式切走角落邊邊，另外還磨了一個雪梨同炆，天然果酸令牛肋條炆得更加軟淋，這就是韓式炆牛肉的最大特點～

其實也不一定要用雪梨，用上其他水果如蘋果或奇異果都可以。至於要用邊一種梨，答案是什麽梨都可以，用上正統的韓國豐水梨或貢梨等等都冇所謂。而且有時水果唔當造，唔係次次都有韓國梨賣呀嘛～只係想要梨的甜和果酸令牛肉醃得更淋，什麽梨都可以啦～

 

另外傳統韓國人煮這個菜，會將蔬菜，例如紅蘿蔔的邊邊都用刀切走，炆出來的蔬菜睇落會圓圓的，比較好看。為什麽要咁樣做呢？原因是蔬菜的邊邊比較薄身，炆咗咁耐，個邊會爛哂，溶掉了，一來唔好睇，二來會令到牛肉的汁多了溶爛的蔬菜而變得混濁，唔好看。所以呢個動作完全是因為賣相的關係，唔做都冇所謂架～



材料：

1. 牛肋條…………400g
2. 洋蔥…………1個
3. 紅蘿蔔…………1條
4. 雪梨…………1個
5. 蒜頭…………2粒
6. 薑茸…………1/2茶匙
7. 蔥…………1束
8. 韓式牛肉醬…………4湯匙
9. 糖…………1茶匙
10. 雞湯…………1 1/2杯


做法：

1. 牛肋條解凍洗淨後，放一大鍋冷水，開最小火煮30分鐘去除雜質，隔水籂乾備用。

2. 洋蔥和紅蘿蔔去皮後切大件，雪梨去皮刨成茸，蒜頭切細粒，青蔥切段。

3. 在鍋內燒熱1湯匙油，先炒香蒜粒和薑茸，加入紅蘿蔔和洋蔥炒至半透明。

4. 放入牛肋條和韓式牛肉醬略炒勻，倒入雞湯，雪梨茸和糖滾起，轉小火加蓋炆1 1/2小時至牛肉軟淋。

5. 最後加入蔥段便成。


小貼士：

1. 想汁稠可以在最後開蓋以中火煮20分鐘至理想濃稠度。

2. 韓式炆肉味道徧甜，非常適合小朋友口味，不喜甜的可以下少許醬油平衡一吓。